Gujarat CM atan Bhupendra Patel lalut

Bhupendra Patel chu nimin khan a term hnihna turin Gujarat Chief Minister atan lakluh a ni a, a rual hian a cabinet minister tur mi 16 lakluh ve nghal an ni.

Chief Minister lakluh inkhawmah hian prime minister Narendra Modi bakah union minister-te - Amit Shah, Srmiti Irani, Rajnath Singh leh BJP chief minister eng emaw zat an tel.

Gujarat assembly inthlan neih zawh takah rorellai, BJP hian seat lak tam lamah state record siamin, assembly seat 182 awmah seat 156-ah an chak a, a ṭum sarihna atan sorkarna an siam leh ta a ni. Congress party-in seat 16 lain, Aam Aadmi Party (AAP) chuan a ṭum khatna atan Gujarat inthlan hi chuhin, seat nga an la ve bawk.

Gandhingar-a new Secretariat bula Helipad Ground-ah CM thar lakluh inkhawm hi neih a ni a, governor Acharya Devvrat chuan rinawmna thu tiamtirin, Gujarat CM 18-na atan a lalut.

Patel rual hian a cabinet minister tur mi 16 lakluh ve nghal an ni a, an zingah hian hmeichhia pakhat chauh a tel. CM hian a cabinet hi a lo tihlen belh leh thuai rin a ni. Minister atana lakluh zingah hian sorkar hmasaa minister lo ni tawh mi 11 telin, mi dang panga erawh hmel thar an ni thung.