Bombay HC-in Maha minister hlui Deshmukh-a bail dilna phalsak

Bombay High Court chuan eiruk thubuaia Central Bureau of Investigation (CBI) in a chhui mek, Maharashtra home minister hlui leh National Congress Party (NCP) hruiatu Anil Deshmukh chu nimin khan bail a dilna a phalsak.

Deshmukh hi jail-ah a tang mek a, High Court-in bail a dilna hi remtihsak mah se, CBI-in High Court thutlukna hi Supreme Court lamah khin let a tum avangin ni 10 chhung chu jail-ah a la awm a ngai dawn a ni. Deshmukh hi Mumbai-a Arthur Road prison-ah a la tang mek a ni.

Special CBI court-in November thlaa a bail dilna a hnawlsak hnuah, kum 74 mi Deshmukh hian Bombay High Court-ah a thlen leh a, nimin khan justice MS Karnik awmna single bench chuan ngaihtuahin a phalsak.

NCP hruaitu hi nikum November thla khan Enforcement Directorate (ED) chuan money laundering case-ah an man. Kumin April thla khan CBI chuan corruption case-ah an man ve leh bawk. ED case-ah hian High Court chuan bail a dilna a lo phalsak tawh a ni.

IPS officer Param Bir Singh chuan kum 2021, March thla khan hetihlaia home minister, Deshmukh chuan Mumbai-a restaurant leh bar hrang hrang aṭangin thla tin Rs vbc 100 khawn khawm ṭhin turin police officer-te tihtur a tuk sak niin a puh. Hemi kum April thla khan CBI chuan preliminary enquiry a nei nghal a, a hnuah Deshmukh leh a thurualpuite lakah eiruk thubuai leh, an thuneihna hmang suala puhna thubuai a siamsak zui a ni.