RS-ah UCC chungchanga private member bill lut pass a ni

Parliament Winter Session neih mekah kar liam ta Zirtawpni khan Uniform Civil Code (UCC) hman tur chungchanga private member bill lut chu eptuten nasa taka an dodalna karah pass a ni.

UCC chungchanga private member bill puluttu, BJP MP Kirodi Lal Meena chu a bill putluh chu sut leh turin eptute chuan an ngen a, chairman Jagdeep Dhankar hnenah pawh he thil hi ram chhunga sakhaw intluktlanna hmelhmang tichhe thei a ni tih sawiin, pawmsak lo turin an ngen bawk.

Eptuten an dodal chungin voice vote hmangin bill hi pass a ni a, a thlawp lamah vote 63 tla in, a duh lo lamah vote 23 a tla. He bill sawiho leh vote lak lai hian eptu party, Congress, Trinamool Congress leh Aam Aadmi Party (AAP) member eng emaw zat an awm lo.

Vote lak hmaa sawihonaah eptu lamte chuan bill putluh chu ram tana danpui kalh, ram tichhetu tur a ni tih sawiin, CPI-M MP John Brittas chuan 21st law Commission pawhin UCC chu thil ṭul lo, hman chi loh niin thutawp an lo siam tawh a ni, a ti. DMK MP Tiruchi Svia pawhin hetiang bill hi a hma pawhin vawi tam tak sawilan a lo ni tawh a, mahse member-te ngenna vangin House-ah putluh a ni ngai lo tih a sawi ve bawk. Congress member L.Hanumanthaiah chuan ideology firfiak lutuk chu democracy tana thil hlauhawm a nih thu sawiin, hetiang thil hi India rama lakluh a ni tur a ni lo, a ti.

Private member bill putluhah hian UCC chu India ram puma hman a nih theihna tura lo buatsaih turin National Inspection and Investigation Committee din rawt a ni. Parliament-a private member bill lut, 'law' a chantir a nih hnuhnung ber chu kum 50 liam ta kha a ni.