China ramria sipaite buaina chungchang sawiho phûtin Parliament in hnih aṭangin eptu member-te an chhuak tau

Congress party kaihhruaiin eptu party member-te chuan nimina Parliament rorel inkhawmah, tun hnaia China ramriah ram pahnih sipaite buaina neih chungchang sawiho an phut a, an thil phut remtihsak an nih loh avangin Rajya Sabha leh Lok Sabha aṭangin an chhuak tau.

Rajya Sabha-a leader of opposition, Congress hruaitu Mallikarjun Kharge chuan China sipaite chet dan, India ram china an rawn luh dante chiang zawka sawiho an duh thu te, India sipaite an thlawp tlat thute a sawi. Mahse deputy chairman Hrivansh chuan hemi chungchangah hian notice engmah pek lawk a awm loh avangin sawiho theih a ni rih lo tiin a chhang.

Deputy chairman-in sawiho an phutna a hnawlsak hnuah eptu member-te chuan an lungawi lohna thute an aupui a, hemi hnu hian House aṭangin an chhuak zui a ni. Rajya Sabha rorel inkhawmna aṭanga chhuakte hi Congress MP-te bakah, Left, TMC, NCP, RJD, SP, JMM leh Shiv Sena member-te an ni.

Defence minister Rajnath Singh chuan Thawhlehni khan Arunachal Pradesh-a Tawang sector-a Line of Actual Control (LAC)-ah December 9 khan India leh China sipaite an intihbuai thu House-ah alo sawi tawh a, mahse buaina thlen dan chiangkuang takin a sawi lang lo.

Kharge chuan China border-a thil thlen dan dik tak chu hriat an duh thu leh, ram mipuite pawhin thil awmdan dik tak hriattir an duh tih a sawi a, China lam hian lei (bridge) an dawh nia sawite pawh a awm a ni, a ti. Kharge-a'n China border chungchang sawiho a phut thu a sawi lai hian a mike off sak a ni a, eptu MP dangte chuan lungawi lo takin an au chhuak nghal a ni.

Lok Sabha rorel inkhawmah pawh eptu member-te chu India-China border issue bakah, thil dang sawiho an phutna phalsak an nih loh avangin House aṭangin an chhuak bawk.

Question Hour zawh veleh, Congress leader Adhir Ranjan Chowdhury chuan Indo-China border chungchang sawiho a phut a, prime minister hlui Pandit Jawarhalal Nehru pawhin kum 1962 khan India-China war chungchang chu Lok Sabha-a sawiho a lo remti tawh a ni, a ti.

Mahse Lok Sabha speaker Om Birla chuan Business Advisory Committee meeting-ah Congress hruaitu thil phut hi ngaihtuah a ni phawt dawn tih a sawi a, sawiho an phutna chu hnawla rorel inkhawm pangngai a kalpui chhunzawm leh nghal avangin Congress bakah TMC MP-te chu House aṭangin an chhuak a ni.

Eptu party hruaitute inhmukhawm

Parliament House complex-ah nimin khan eptu party hrang hrang hruaitute inhmukhawmin, Parliament Winter Sessin neih mekah sorkar nawrna kawnga hma lak dan turte an sawiho.

Rajya Sabha-a leader of opposition, Mallikarjun Kharge chamber-a inhmuhkhawmnaah hian Congress, Shiv Sena, CPI, CPI-M, NCP, RJD, NC, SP, DMK hruaitute an tel a, border issue bikah sorkar nawr dan turte an sawiho tel a ni. Hei bakah hian eptu party-ten Parliament in hniha issue pawimawh hrang hrang sawichhuah leh an kalpui dan turte an sawiho bawk.