Sidhu Moosewala thih dan chhuitu police 13-ten vau tawk

Punjabi singer Sidhu Moosewala thah thubuai buaipuitu, police official 13-te chuan Canada-based gangster Lakhbir Singh Landa hnen aṭanga thaha vauna an dawn avangin venhimna pek an ni.

Vauna tawk police official 13-te hi Delhi Police mi vek an ni a, venghimtu pek an nih bakah, an chenna inte pawh uluk taka ven tir an ni bawk. An zinga mi, Special Commissioner of Police (Special Cell) HGS Dhaliwal, Deputy Commissioner of Police - Rajeev Ranjan leh DCP Special Cell Manishi Chandra-te chu Y-category security pek an ni

Sidhi Moosewala tia hriat lar, Shubhdeep Singh Sindh hi kumin May 29 khan Punjab-a Mansa district-ah kahhlum a ni. Lawrence Bishnoi gang member, Satinderjeet Singh alias Goldy Brar chuan Moosewalla thahna ruahmantu ber a nih thu sawiin, a lakah hian red corner notice tihchhuah a ni tawh. December 2 khan Punjab chief minister Bhagwant Mann chuan Goldy Brar hi US-ah man a nih thu a sawi a, mahse December 5 khan online interview-ah Brar hian man a nih loh thu a rawn sawi a, US-ah pawh a awm lo niin a sawi bawk.