UN headquarters-ah Gandhi lim tlangzarh

External affairs minister S Jaishankar leh United Nations secretary general Antonio Guterres-te chuan Nilaini khan New York-a UN headquarters-a North Lawn Gardens-ah Mahatma Gandhi lim an tlangzarh.

Gandhi lim, a awm chin chunglama siam hi India-in UN hnena a pek niin, UN headquarters-a Gandhi lim dah hmasak ber a ni. He milim hi Ram Vanji Sutar siam niin, ani hi Gujarat-a khawvela milim sang ber, meter 182-a sang Statue of Unity siamtu a ni.

UN headquarters-a Gandhi lim hawnna inkhawm buatsaihah hian UNSC member aiawhte leh UN senior official-te an tel. UN secretary general Guterres chuan Mahatma Gandhi chu remna leh muanna duhtu, inthliarna dodaltu a ni tiin, UN headquarters-a a lim dah chuan Gandhi-a thil ngaihhlut leh ngaihsante a hriattir nawn leh ṭhin dawn tih a sawi.

UN headquarters-ah ram dangin an thil pek hrang hrangte pholan a ni a, heng zingah hian Germany pek Berlin Wall them, South Africa ram pek leh Nelson Mandel lim pawn an tel. India-in kum 1982-a a pek, kum zabi 11-na hunlaia mi, Surya (the Sun God) lim pawh a awm bawk.

India hian December thla chhung United Nations Security Council president hna hi a chelh dawn a, Nilaini khan Jaishankar chuan High-Level Ministerial Open Debate chu kaihruaiin, nimin khan 'Global Approach to Counter Terrorism - Challenges and Way Forward' tih thupui hmanga high-level briefing a kaihhruai leh bawk a ni.