BJP MP-ten zu khapna dan ngaihtuah ṭha turin Bihar CM ngen

Union minister Giriraj Singh leh Bihar BJP MP-te chuan Bihar chief minister Nitish Kumar chu an state-a zu khapna dan an hman mek chu ngaihtuah ṭha leh turin an duh tih an sawi.

Bihar-a Saran district-ah zu chhe in vangin mi 40 dawn an thi tih Nilaini khan police-ten an sawi. He thil thleng vang hian zu khapna dan an hman mek chu sawisel leh beih zui a hlawh hle.

Union minister Singh chuan CM Kumar hian prohibition policy an hman mek chungchangah all-party meeting ko a, thutlukna an siam thar a ngai a ni, a ti. "Policy hi a hlawhtling lo a nih chuan ngaihtuah ṭhat leh mai tur a ni," tiin a sawi.

BJP MP Ram Kripal Yadav pawhin CM Kumar chuan zu khapna dan chu hlawhtling taka a kalpui theih loh chuan a bang mai tur a ni, a ti. "Zu chhia in vangin Bihar-ah thi an awm reng a, zu khapna dan hman chu a hlawhchham chungin CM chu a ṭang lui tlat a ni. Pawikhawihna thleng pawh a hluar zel a ni," a ti.

Nilainia BJP MLA-ten Assembly-ah Saran district-a zu chhe in vanga thi an awm chungchanga sorkar an sawisel chuan CM Kumar a ti thinur hle a, eptu pawh chu an vaiin zu rui ang mai an ni tiin a aukhum.

CM Kumar chuan nimin khan zu in ṭhat loh zia, zu khapna dan hman a ṭul thu sawi nawn lehin, Sharan district-a thil thleng chu inzirna atana hmang turin mipuite a chah. Zu siamtute leh zuartute chu man ngei turin official-te a hriattir tawh thu a sawi bawk. Hemi rual hian mi rethei zawkte erawh chu man lo tura a hrilh thu sawiin, zu hmanga sumdawnnaah tumah inhnamhnawih lo turin a ngen a, mi retheite chu kawng danga ei an zawnna turin Rs nuai 1 pek pawh a inhuam tih a sawi bawk.