Delhi Airport tawt lutuk ziaawm thuai beisei a ni : J Scindia

Civil aviation minister Jyotiraditya Scindia chuan thlasik chawlh awmchho tur vanga Indira Gandhi International (IGI) Airport-a khualzin tawt lutuk chu an rin phak bak a nih thu sawiin, khualzin tam lutuk vanga airport-ah harsatna awmte chu chinfel tum a ni, a ti.

Khualzin tam leh tawt vang hian Delhi airport aṭanga thlawk chhuak turte chu an thlawh chhuah hun hma darkar thum-darkar li-ah aiport hi thleng hman turin airlines-te chuan an ngen. Indigo chuan departure time aia darkar thum leh a chanve-a hmaa airport thleng hman tur leh, bungrua pawh hand baggage pakhat chauh keng turin an ngen a, Air India pawhin international passenger-te chu an thlawh chhuah hma darkar lia airport-a thleng hman turin a ngen bawk.

Minister chuan khualzin an tam avangin entry gate leh security checkpoint-ahte mipui an inhnawh tawt lutuk a, mipui innekbuai tur venna tura hma lak leh, gate-ah CCTV camera dahte a rawt. Airport chhunga security checkpoint 11 awm chu 20-ah tihpun chhoh a ni dawn tih sawiin, "Ni 7-10 chhungin airport dinhmun ziaawm a, a pangngai chhoh leh beisei a ni. Hemi atan hian airline ho nena thawhhona ṭha tak kan nei a ngai bawk," tiin a sawi.

Nimin khan union home secretary Ajay Kumar Bhalla kaihhruaiin airport dinhmun hi ngaihtuahin high-level meeting neih a ni bawk.