RS-ah India-China ramri buaina chungchang sawiho phut leh
Parliament Winter Session neih mekah, nimina Rajya Sabha rorel inkhawmah eptu member-te chuan India-China ramri buaina sawiho an phut leh.
Eptu member-te thil phut hi rorel inkhawm kaihhruaitu, House deputy chairman Harivansh chuan a hnawlsak a, hei vang hian eptu MP-te chu lungawi loin House laiah an chhuak khawm a, rorel thei loa an au buai avangin Rajya Sabha inkhawm hi chhun dar 12 thleng tihtawp a ngaih phah.
Congress MP Randeep Singh Surjewala chuan China ramria thil thleng chungchang sawihona tur hian a hmain Rule 267 hnuaiah Suspension of Business Notice a lo pe tawh a, House chairman hnenah Prime Minister leh sorkar laipui chu hemi chungchangah hian thuchhuah siam tura ngen turin a ti bawk.
Congress president leh leader of opposition Mallikarjun Kharge pawhin India-China ramria buaina thleng chu House-ah hian a sawichhuak tawh bawk a ni.
Nimin bakah a hma ni hnih khan Congress leh eptu party member dangte chuan ramri-a sipaite buaina chungchang sawiho phutin House aṭangin an chhuak tau a ni. Eptuten sawiho an phutna hi hnawlsak zel a ni a, Kharge chuan, "Indian Parliament-ah hian China sawisel phal a ni lo em ni?" tiin sorkar chu a bei.
Minister zawhna chhan danah eptute lungawi lo
Lok Sabha inkhawmah ram chhunga fuel man sang zel chungchang zawhna, petroluem minister Hardeep Singh Puri-a'n a chhan danah eptu member-te lungawi loin, Ningani khan rorel inkhawmna aṭangin an chhuak tau bawk.
Congress MP K Muralidharan-a'n, international-a crude oil man a san zawk lai ai pawha ramchhunga petrol man a san zawkna chhan a zawhna chhangin, minister chuan crude oil man chhutin India rama petrol leh diesel man chu a la hniam hle zawk niin a sawi. Fuel man sang avangin BJP sorkarna state-te chuan VAT rate an tihniam a, hetih lai hian eptu party sorkarna state-ah erawh an tihniam ve lo niin a sawi. Eptu MP-te chu hemi chungchangh hian an awmna state-ah ṭheuh sawi turin a ti a, zawhna a chhan danah fuel man sang zel chungchangah sorkar laipui hum tumah puhin, eptu member-te hi lungawi loin an chhuak a ni.