Maiden Pharmaceuticals syrup siamah thil dik lo hmu lo

World Health Organisation (WHO)-in Gambia rama naupang 69-te thihna thleng chungchangah, India ram aṭanga khuh damdawi lakluh nen inzawmna a nei maithei nia sawi hnuah, laboratory-a syrup sample endiknaah thil dik lo engmah hmuh a nih loh thu an sawi.

Gambia rama syrup thawntu, Maiden Pharmaceuticals Ltd chu naupangte thihna thlen hnuah factory kharsak an ni. Mahse sorkarin laboratory-a an endikna result a chhuah hnuah, company chuan an factory-te hawn phalsak leh turin dilna an thlen dawn tih an sawi.

Maiden Managing director Nareh Kumar Goyal chuan, "Thil tih dik loh engmah kan nei lo. India rama inkaihhruainate hi kan ring tawk a, thuneitute hnenah factory hawn min phalsak turin kan dil dawn, Mahse eng hunah nge kan hawn theih dawn tih erawh kan sawi thei lo," a ti.

WHO report-in Maiden Pharmacueticals Ltd damdawi siamte hi Gambia naupangte thihna chhan a ni thei nia a sawi hnuah, health lama thuneitute chuan October thla khan Haryana-a Maiden factory hi an kharsak a ni. Naupang khuh damdawi an siam pali, Gambia rama an thawnte chu a sample endik sak nghal an ni bawk.

Drugs Controller General VG Somani chuan Maiden damdawi siam sample-te an endik hnuah, ethylene glycol leh diethylene glycol hmuh a ni lo a, an tarlan ang bak engmah hmuh a awm loh thu WHO hnenah a lo hriattir tawh a ni. Test hi Chandigarh-a Regional Drug Testing Laboratory-ah neih niin, a result pawh hi panel of expert hnenah thawn vek a nih thu a sawi.