Bihar-a zu chhe in vanga thihna thleng chungchang Rights body team-in a chhui chiang dawn

National Human Rights Commission (NHRC) chuan Bihar-a zu chhe in vanga mi tam tak thihna a thleng nia sawi chungchangah, a hmun ngeia thil awmdan enfiaha chhuichian turin investigation team a tir dawn.

Official-te chuan Saran district-ah zu chhe in vanga mi eng emaw zat an thih hnuah, Inrinni khan district dang pahnih, Siwan leh Begusarai district-ah zu chhe in vang bawkin mi pariat an thih belh leh niin an sawi a, heng mite nen hian tun hnaiah Bihar-ah hian zu chhe in vangin mi 60 vel an thi tawh nia report a ni. Mahse official report erawh chuan thi zat hi 30 niin a tarlang thung.

Media report-in Bihar-a district hrang hrangah zu chhe in vanga thi an awm thu an report hnuah, NHRC chuan a hmun ngeiah kal a, thil awmdan enfiah hi a tum ta a ni. Commission chuan zu chhe in vanga harsatna tawtke chu eng anga enkawlna nge pek an ni tihte enfiah a tum. An zinga a tam zawk hi chhungkaw harsa tak tak ami niin, private hospital-ah inenkawlna nei zo lo te an ni. Hei vang hian state sorkar chuan heng mite hian a theih anga enkawlna ṭha a pek a ngai a ni, tiin thuchhuah a siamah a tarlang.

Rights panel chuan, "Commission chuan zu chhe in vanga thi chhunge hnenan sorkarin chhawmdawlna a pek dan te, zu chhe siam leh hralhchhuah tihtawp a nih theihna atana a hmalak dante a hre duh a ni," a ti. Saran district-a thil thleng chungchangah NHRC hian Bihar sorkar leh state police hotute chu hriattirna a lo pe tawh a ni.

Kum 2016, April thla aṭang khan Bihar-ah zu zawrh leh in hi khap a ni a, mahse he khapna dan hi a hlawhtling lo hle nia a ngaih thu NHRC chuan a sawi.