Mumbai-ah eptu ṭangrual pawlin kawng an zawh

Maharashtra state-a eptu ṭangrual pawl, Maha Vikas Aghadi (MVA) chuan chief minister Eknath Shinde kaihhruai sorkar laka lungawi lohna lantirin, Inrinni liam ta khan 'Halla Bol' kawngzawh an huaihawt.

Mumbai-a Byculla-a JJ Hospital bul aṭangin kawng hi an zawh ṭan a, south Mumbai-a Chhatrapati Shivaji Maharaj Terminus (CSMT) thleng an kal a ni.

He kawngzawh hi Eknath Shinde kaihhruai Shiv Sena leh BJP ṭangrual sorkar leh govenror Bhagat Singh Koshyari-ten Maratha warrior king Chhatrapathi Shivaji Maharaj leh social reformer Mahatma Jyotiba Phule leh Savitribai Phule chungchang zah lo taka an sawi dan avang te, Maharashtra-Karnataka ramri buaina thleng mek leh, state chhunga project eng emaw zat hmun danga sawn a nih vang tea lungawi lohna lantirna atana an huaihawt a ni.

Kawngzawhnaah hian Uddhav Thackeray kaihhruai Shiv Sena, National Contress Party (NCP) leh Congress party hruaitu leh worker-te an tel.

Hetih lai hian BJP chuan MVA-ten kawng an zawh lai hian Mumbai khawpui chhunga parliamentary constituency parukah 'Maafi Mango' protest an nei ve bawk. Uddhav Thackeray-a lam Shiv Sena pawla hruaitu Sanjay Raut chu Dr BR Ambedkar pianna hmun chungchanga inhnialna chawk chhuaktuah an puh a, anni bakah an pawl hruaitu dang Sushma Andhare chu Hindu pathian leh puithiamte sawichhiaah an puh bawk. MVA hruaitute chu an thupha chawi turin an phut.