AAP-in National Council meeting nei

Aam Aadmi Party (AAP) chuan nimin khan New Delhi-ah National Council meeting an nei a, ram chhung hmun hrang hranga huang zauh zel dan turte an sawiho.

Meeting hi AAP convenor leh Delhi chief minister Arvind Kejriwal-a'n a kaihruai a, party office bearer-te bakah AAP elected representative, MLA leh MP-te an tel.

Party huang zauh zel dan tur te, kum 2024 Lok Sabha inthlanpui neih tur thlir chungin state assembly inthlan neih tura hma lak dan turte an sawi ho. Hei bakah hian ram chhunga thil man sang zel, hnathawh nei lo pung zel leh tun hnaia ramria China sipaite chetdante pawh an sawiho bawk. Resolution-te pawh pass nghal an tum.

AAP National Council hi an party chunga thuneitu sang ber a ni. Meeting hi Kapashera-a resort-ah neih a ni.

Kejriwal kaihhruai AAP hian Tun hnaia Gujarat assembly inthlanah a ṭum khatna atan chuhin, seat panga an la a, vote tla aṭangin 13% dawn an hmu pha. Hei vang hian Election Commission of India hnenah national party status an dil thei tawh dawn a ni. AAP hian Delhi leh Punjab-ah sorkarna an chelh mek a, Goa leh Gujarat assembly-ahte MLA an nei tawh bawk a ni. Municipal Corporation of Delhi (MCD) inthlanah pawh AAP hian hnehna changin, kum 15 chhung BJP-in thuneihna a lo channa chu an tihtawpsak thei ta a ni.