Gujarat leh HP-ah BJP in hnehna chang Gujarat-ah Congress-in hma a sawn

19th December, 2017

Gujarat leh Himachal Pradesh assembly inthlan result chu nimin khan puan a ni a, BJP chuan state pahnihah hnehna a chang.

Gujarat hi BJP sorkarna niin, a term rukna turin a tling leh a, Himachal Pradesh-a Congress party sorkarna pawh a chhuhsak dawn ta a ni. Gujarat-a hian BJP hian sorkarna siam leh dawn mah se, 2012 inthlan aiin Congress party chuan hma a sawnhle thung.

Himachal Pradesh-ah hian assembly seat 68 a awm a, Gujarat-ah seat 182 a awm.

Himachal Pradesh-ah hian kum 1985 aṭang khan Congress leh BJP sorkar hlir a la indinchhawk a ni. Kum 2012 inthlanah khan Congress chuan seat 36 lain, BJP in seat 26 leh independent-in seat ruk an la a ni. Mahse kumin inthlanah Congress chuan a thuneihna hum zo loin BJP sorkar a ding dawn ta a ni. BJP hian seat 44 lain, Congress in seat 21 a la a, party dangin seat 4 an la bawk. BJP hian party malin sorkarna a siam dawn a ni.

Gujarat-ah hian BJP hian term nga, kum 20 chhung ro a rel tawh a, a term rukna atan a sorkar chhunzawm leh dawn a ni. Gujarat assembly-ah hian majority sorkar siam turin member 92 neih tlin a ngai. Assembly seat 182 awmah BJP chuan seat 99 lain, Congress chuan seat 80 a la pha bawk. Kum 2012 inthlanah khan BJP hian seat 115 zet a la pha a, Congress chuan seat 61 chauh a la a ni.

Gujarat-ah hian BJP hi khawpui lamah che ṭha mah se, thingtlang lamah a che ṭha lo hle a, Congress party hi thingtlang lamah a che ṭha thung.

BJP hruaitute chuan state pahniha sorkarna siam thei tura hnehna an chan chhan chu Prime Minister Narendra Modi-a leh BJP president Amit Shah-te hnathawh rah niin an sawi a, mipuiten PM Modi-a an rintawk zia an lantirna a ni, an ti. Gujarat-ah chuan an beisei zat pha lo mah se, party mala sorkarna siam tur khawpin an la chak tawk tih an sawi bawk.

Central-a BJP thawhpui, Shiv Sena chuan Gujarat assembly inthlan chungchangah Congress president thar Rahul Gandhi chu fakin, kum 47 mi Congress president hian an party chu dinhmun harsa tak aṭangin a hruaichhuak a ni, a ti. Prime Minister Narendra Modi-a state, BJP-in kum 20 zet sorkarna a lo chan tawhnaah hian Rahul Gandhi chuan inringtawk takin a party chu inthlan a hmachhawn pui a, hetianga inrintawkna a neih hian hma a sawntir ngei dawn a ni, a ti.