Rahul-a'n Congress MP-te zanriah buatsaih sak

Congress Party President thar, Rahul Gandhi chuan Pathianni tlai khan Congress MP-te tan zanriah a buatsaih sak a, party dang hruaitu ṭhenkhat an tel bawk.

Congress MP-te tana zanriah buatsaihah hian Congress parliamentary party chairperson Sonia Gandhi, president hlui Pranab Mukherjee, vice president hlui Hamid Ansari leh prime minister hlui Manmohan Singh-te pawh an tel. Anni bakah hian eptu party dang CPI(M) general secretary Sitaram Yechury, National Conference hotu Farooq Abdullah, NCP leader Praful Patel, JD(U) hruaitu hlui Sharad Yadav, Samajwadi Party hotu Ramgopal Yadav, RJD hruaitu Misa Bharati leh Jai Prakash Narayan Yadav-te pawh an tel a ni.

Parliament session neih mek a ni a, hetihlaia Rahul Gandhi-an eptu hruaitute zanriah a buatsaihsak hian ngaihven a hlawh hle. Mahse Congress party chuan Parliament session laia an tihdan phung niin a sawi a, hetihlai hian ṭhenkhat chuan Rahul Gandhi-an eptu party inpawhna ṭha zawk a neihpui theih nana a buatsaih niin an sawi thung.

Rahul Gandhi hian Congress President dinhmun a chelh hnuah Pathianni khan Prime Minister Narendra Modi chu lehkha thawnin, Cyclone Ockhi tleh vanga Kerala, Tamil Nadu leh Laskshadweep-a sangha mantu nunna chan chhungte chu chhamdawlna pe turin a ngen. Gandhi chuan thlipui tleh vang hian sangha mantuten harsatna nasa tak an tawk tih sawiin, December 14-a Kerala leh Tamil Nadu a tlawh ṭum pawh khan an zinga ṭhenkhat chu a kawm thu a sawi. Cyclone tleh hian an eizawnna kawngah harsatna nasa tak a thlen a ni, a ti.