Gujarat leh HP CM tur la chiang lo

20th December, 2017

Gujarat leh Himachal Pradesh assembly inthlan neih zawh takah BJP chuan hnehna changin sorkar thar a siam dawn a, mahse state pahniha chief minister turte tihfel a la ni lo.

Himachal Pradesh-ah chuan BJP hian rorellai Congress Party hnehin sorkar thar a siam dawn a, mahse chief minister tura an hmatheh ber Prem Kumar Dhumal chu a chak zawh loh avangin sorkar thara chief minister tur hi a la chiang lo.

Chief minister atan hian cabinet minister hlui Jairam Thakur leh Union Health Minister JP Nadda-te hming chu sawirik a ni. Thakur chuan central lama an hruaitute thutlukna siam ang chu a pawm tur thu a sawi.

Thakur chuan, "Party-in a rel dan ang chu ka pawm zel ang. Himachal Pradesh-ah BJP sorkar a ding tur chu ka lawm hle a, state mipuite chungah pawh lawmthu kan sawi a ni", a ti. Sorkar thar chuan state chhung hmasawnna turin theihtawp a chhuah dawn tih a sawi nghal bawk.

Assembly inthlanah hian BJP chuan hnehna chang mah se, chief minister tura hual Dhumal chuan Sujanpur bial-ah Congress candidate Rajinder Rana a hneh zo lo. BJP state president Satpal Singh pawh Una bialah a chak zo lo bawk.

Himachal Pradesh inthlanah hian BJP chuan assembly seat 68 aṭangin seat 44 a la pha a, Congress party-in seat 21 a la a ni.

Gujarat state-ah BJP chuan a term rukna atan sorkarna a siam leh dawn a, chief minister ṭanglai Vijay Rupani chu Rajkot West bial aṭanga thlan tlin niin CM atan hian dah chhunzawm rin a ni. Mahse party lam thuneitute chuan CM tur hi an la puang lo a, CM atana sawilan zingah hian Information and Broadcasting Minister Smirti Irani hming pawh lamrik a ni.

State pahnih inthlan result tihchhuah a nih hnu hian BJP central parliamentary board chuan Gujarat leh Himachal Pradesh-ah hian team a tirh nghal tur thu a sawi a, anni hian chief minister tur hi an ruat dawn a ni. Gujarat-ah hian Finance Minister Arun Jaitley leh party general secretary Saroj Pandey-te an kal ang a, Himachal Pradesh-ah Defence Minister Nirmala Sitharaman leh Rural Development Minister Narendra Singh Tomar-te an kal ang.