India aṭangin ram danga pem lut tam

2017 International Migration Report tihchhuahah, India aṭanga ramdanga pem chu kum 2000 aiin a letin an pung a, an zinga a zahve aia tam chu Gulf region-ah an awm.

Report-in a tarlan danin, kum 2017-ah India aṭanga ram danga pem hi mi maktaduai 16.59 awmin, ram khat aṭanga pem chhuak tam ber an ni. Mexico in dawtnin mi maktaduai 13 an awm bawk.

India mi, ramdanga pem zinga mi maktaduai 3.31 chu United Arab Emirates-a pem an ni a, US-ah maktaduai 2.3 an awm bawk. Gulf ram hrang hranga India mi pem lut awm chu maktaduai 8.9 an tling a, an zinga maktaduai 2.27 chu Saudi Arabia-ah awmin, Oman-ah maktaduai 1.2 leh Kuwait-ah maktaduai 1.16 an awm.

Europe-ah hian India aṭanga pem lut maktaduai 1.3 an awm a, kum 2000 report aiin a letin an tam. Britain-ah pawh kum 2000-ah India aṭanga pem lut 452,144 an awm laiin, kum 2017-ah chuan 836,524 an tling a ni.

Hetih lai hian ram dang aṭanga India rama rawn pem lut hi maktaduai 5.2 an awm a, kum 2000 aiin maktaduai 1.22 in an tlem thung.