Gujarat inthlana hnehtu dik tak chu Congress : Shiv Sena

Gujarat assembly inthlanah BJP chu a term rukna atan thlan tlin leh a ni a, hetihlai hian tun ṭum inthlan hi Congress party-in Gujarat-a kum 35 chhunga seat a lak hnem ber ṭum niin hei hian sawi zui a hlawh zawk a ni.

Central-a BJP thawhpui, Shiv Sena chuan Gujarat-a chuan BJP-in sorkarna siam leh dawn mah se, hnehna changtu dik tak chu Rajiv Gandhi kaihhruai Congress a ni, a ti. Sena hotu Sanjay Raut chuan BJP-in sorkarna a siam leh tur chu thil pui tham tak a ni lo tiin, Congress chuan inthlanah hnehna chang zo lo mah se, BJP a hneh a ni, a ti.

Sanjay Raut chuan BJP-in Gujarat model a chhuan tak chu a hlawhchham nia sawiin, rampum huapa thuneihna chang tura a hruaina kawng chu a hlawhchham a, hei hi BJP hian state leh ram miputie hnena a lo tiamte chu a taka chantir a nih loh vang a ni, tiin a sawi.

Congress hruaitu hlun P Chidambaram chuan Gujarat leh Himachal Pradesh inthlana hnehna an chan avangin BJP chu a lawmpui thu a sawi a, hemi rual hian an party chuan Rahul Gandhi-a kaihhruaina hnuaiah Gujarat-ah hmasawnna nasa tak an hmuh thu a sawi. Chidambaram chuan kum 2018-a assembly inthlan neihna tur state panga–Karnataka, Meghalaya, Nagaland, Tripura leh Mizoram tan hma an lak nghal tur thu a sawi bawk.

Chidambaram chuan state pahniha inthlanna neihnaah khan electoral victory leh political victory a awm tih sawiin, BJP chuan sorkarna siam dawn mah se, Congress chu political victory changtu a ni, a ti.

Gujarat Assembly inthlanah hian rorellai BJP chuan assembly seat 182 aṭangin seat 99 lain a term rukna atan sorkarna a siam leh dawn. Inthlanah hian hnehna chang mah se BJP hian kum 2012 inthlana a seat lak 115 chu seat 16 laiin a la pha lo a ni. Hetihlai hian Congress chuan seat 80 lain, inthlan hmasa aia seat 19 zetin a la hnem a ni.

BJP President Amit Shah chuan an campaign laiin Gujarat-ah BJP in seat 150 lak phak an tum thu a sawi tawh a, mahse an beisei ang an pha lo hle a, a chhanah Congress-in politics bawlhhlawh taka a khelh vang niin a puh. Prime Minister Narendra Modi leh BJP hotu Amit Shah-te chuan Congress party chu thuneihna chan a duh luat vangin chi inthliarna lam hawi zawnga politics khelah an puh. BJP president chuan Congress campaign dan dik lo tak chu an party chet chhiat chhanah a puh a ni.