China border chungchang sawiho remtih loh vangin Rajya Sabha aṭangin eptu member-te chhuak táu leh

Parliament Winter Session neih mekah, nimina Rajya Sabha inkhawmah eptuten tun hnaia India-China border-a sipaite intihbuaina thleng leh, China sipaite India ram chin rawn luh an tum dante eptuten sawiho an phutna chu Rajya Sabha chairman Jagdeep Dhankhar chuan a hnawlsak leh vangin House aṭangin eptu MP-te an chhuak tau.

Eptu MP eng emawzat chuan India-China border buaina thleng chungchang sawiho phutin Rajya Sabha-ah hian suspension of business notice an pe a ni. Congress party president, leader of opposition Mallikarjun Kharge chuan, "China hi kan ram chinah an rawn lut a ni. Hemi chungchang hi kan sawiho loh chuan eng thil dang nge kan sawi chuan ang? House-a sawiho tur hian kan inpeih reng a ni," a ti.

Arunachal Pradesh-a Tawang sector-a India leh China sipaite an intihbuai hnuah, eptute hian he thil thleng leh, ramri buaina chungchang hi House-ah sawiho an phut reng a, mahse an thil phut hi hnawlsak zel an la ni.

Congress party chuan border buaina thleng chungchang Parliament-a sawiho an phutnaah prime minsiter Narendra Modi chu tlanchhiaah an puh a, he thil thleng chungchanga zawhna awmte chu defence miniter Rajnath Singh ni loin, PM chuan a chhang tur a ni, an ti. Border-a ram pahnih sipaite intihbuaina a thlen hnuah PM hian 'China' tih thu chu vawikhat pawh a la sawichhuak lo nia sawiin, sorkar lam ngawih reng chhan pawh an zawt zui bawk.