Indian Navy kutah warship INS Mormugao hlan

Defence minister Rajnath Singh chuan Pathianni khan stealth guided-missile destroyer, P15B warship INS Mormugao (D67) chu Indian Navy kutah a hlan.

Mumbai-a Naval Dockyard-ah warship hlanna hun hi hman a ni. INS Mormugao hi India rama siam a ni a, Warship Design Bureau-in a design a, a siam hna hi Mazagon Dock Shipbuilders Limited (MDL), Mumbai-in a thawk a ni. He indo lawnglian hi m 163-a sei leh, m 17-a zau niin, ton 7,400-a rit a ni a, surface-to-surface missile leh surface-to-air missile a kapchhuak thei a, nuclear, biological leh chemical warfare-ah pawh hman theih tura duan a ni.

Rajnath Singh chuan INS Mormugao chu ram chhunga indo lawnglian siam ṭha ber zinga mi a ni tih sawiin, Indian Navy pawh nasa takin a thuam chak dawn a ni, a ti. "INS Mormugao hi khawvela technologically-advanced missile carrier ṭha ber zinga mi niin, a siamna hmanrua 75% hi ramchhunga mi a ni. Hei hian warship design leh siamna kawnga India ṭhatna nasa taka lantirtu niin, ram chhung ngeiah defence lam hmanrua siamna len chhoh zel dan pholangtu a ni," tiin Minister chuan a sawi. MDL pawh fakin, anni bakah lawng siamtu company dangte pawh ṭan la zel a, sorkar hmalaknate remchangah hmang thiam tur leh, India ram chu lawngsiamna hmunpuia din chho tura hma sawn zel turin a chah.