BJP-in Pakistan foregin minister Zardari laka lungawi lohna lantir

Pakistan foreign minister Bilawal Bhutto Zardari-a'n United Nations Security Council meeting-ah prime minister Narendra Modi chungchang a sawi dan chu BJP chuan na taka demin, ram pum huapin lungawi lohna an lantir a, Zardari lim an hal bawk.

UNSC meeting-ah kar liam ta Zirtawpni khan external affairs minister S Jaishankar chuan Pakistan ram chu Osama bin Laden lo enkawltu ram tiin a puh a, hemi hi a chhan letnaah Zardari chuan prime minister Modi chu mimal takin a bei zui a ni. Zardari chuan, "India ram chu Osama bin Laden a thi tawh tih ka hrilh duh a, mahse Gujarat-a satalhtu chu a la dam a, tunah hian India Prime Minister a ni mek a ni," tiin a sawi.

Modi chungchang a sawidan avanga BJP-in lungawi lohna an lantir pawh chhang letin an kawmnaah a chhang leh nghal a, PM Modi, Rashtriya Swayamsevak Sangh (RSS) leh BJP chu a hlauh loh thu a sawi. "Hetianga lungawi lohna an lantir hi Pakistan tihṭhaih an tumna a nih chuan awmzia a nei dawn chuang lo a, kan hlau hek lo. An duh dan angin lungawi lohna lantir rawh se," tiin Gujarat-a thil thleng chungchanga tuna India prime minister ni mek inrawlh dan chu history-ah a lang vek a, BJP leh RSS-in eng ang pawhin nawrh huaihawt mah se history chu an tidanglam dawn chuang lo, tiin a sawi zui.

Ministy of External Affairs (MEA) pawhin Pakistan Minister thusawi hi a dem thu sawiin, Pakistan tan takngial pawh a zahthlak a ni, a ti.