Judge hlui CS Karnan jail aṭangin chhuak

Calcutta High Cout judge hlui, Justice CS Karnan chu nimin khan Kolkata-a Presidency Jail aṭangin chhuah tir a ni.

Justice CS Karnan hi court thupek zah loa puhin Supreme Court chuan man turin a ti a, thla ruk chhung jail tantir a ni. High Court judge ṭanglai zingah jail-a tang hmasa ber a ni. Jail-a a tan lai hian a term a hmang zo zui bawk a ni.

May 9 khan hetihlaia Chief Justice of India Justice Jagdish Singh Khehar kaihhruai judge pasarih awmna, Supreme Court bench chuan CS Karnan manna thupek hi an tichhuak a ni. Manna thupek tihchhuah a nih hnu hian CS Karnan hi a bibo zui a, ngawrh taka zawn a nih hnuin June 20 khan Tamil Nadu-a Coimbatore-ah man a ni a, a tukah Kolkata panpuiin Presidency Jail-ah dah luh a ni.

Calcutta High Court judge hian Dalit hnam a nih avangin Supreme Court bench hian an tiduhdah niin a sawi a, Kolkata-a a chenna inah 'residential court' siamin, CJI Khehar leh judge dang parukte chu inlan turin a ko a ni. Hei bakah hian West Bengal DGP chu judge pasarihte hi man tur thu a pe a, CJI leh judge parukte chu psychiatric test nei turin a ti bawk. A hnuah heng judge-te hi SC/ST (Prevention of Atrocities) Act hnuaiah thiam loh a chantir zui a ni.

Kolkata-a Presidency Jail-ah dahluh a nih hma hian CS Karnan hian interim bail a dil a, mahse a dilna hi Supreme Court chuan a hnawlsak. Thla ruk tang tura hremna pek pawh Justice DY Chandrachud leh Justice Sanjay Kishan Kaul awmna vacation bench chuan a thlak danglam sak duh lo bawk.