Apollo Hospital-a Jaya-i video tichhuak

Tamil Nadu chief minister hlui, J Jayalalithaa-i bial thihsan, RK Nagar by-poll neih tura inbuatsaihna a kal mek laiin, TTV Dhinarakan-a thlawptu pakhat chuan Apollo Hospital-a Jayalalithaa-i awm lai video a tichhuak. TTV-a lamṭang, Vetrivel chuan Jaya-in damdawi-ina a khuma thei tui a in lai hi a tichhuak a, a ni leh hun erawh a inziak lang lo. Vitrivel chuan he video hi ICU aṭanga Jaya-i lakchhuah a nih hnua a thachhang dawltu ber, Sasikala-in a mobile phone aṭanga a lak niin a sawi. Tamil Nadu Election Commission chuan video footage tihchhuah chungchangah media mite chu hriattirna a pe nghal a, he video tichhuah hi model code of conduct palzutna a nih thu sawiin, a tichhuak luite chungah action lak a nih tur thu a sawi a ni.

Jayalalithaa-i hi nikum September 22 khan khawsik leh dehydration vangin Apollo Hospital-ah hian dahluh a ni a, ni 75 zet enkawl a nih hnuah December thla khan a thi a ni. Damdawi-ina enkawl a nih dan leh a natna chungchangah inhnialna tam tak a awm chho a, enkawl a nih lai pawh hian a dinhmun dik tar tarlan a ni ngai lo nia sawi a ni. Damdawiina enkawl a nih dan dik tak lanna hi hospital health bulletin-a tarlan bak hriat tur a awm lo a, hma a sawn leh sawn loh chungchang pawh amah kantu minister-te ka aṭang chiaha hriat ṭhin a ni.

A thih hnuah a party, AIADMK zingah Jaya nat leh thih dan chungchang dik tak hriat duha ṭawngchhuak an awm a, party hruaitu ṭhenkhat pawhin a nat dan chungchangah hian thu dik tawk lo mipuite an hrilh niin an sawi bawk a ni.

Kumin August 17 khan Chief Minister Edapaddi K Palaniswami chuan Jaya-i thih dan chhui chiang tur din a nih thu a puang a, investigation committee hi Madras High Court judge A Arumugasmay-an a ho a ni. Committee hi tun thla tawpa report thehlut tura hriattir an ni bawk.