2G case : A Raja leh Kanimzohi-te thiam chantir

India rama telecom scandal lian ber nia sawi, 2G scam kaihhnawiha thubuai siamsak, telecom minister hlui A Raja, M Kanimzohi leh midang 15-te chu nimin khan an thubuaiah thiam chantir an ni.

2G licence pekchhuahnaah hian dik lo taka thiltih a nih avangin sorkarin cheng vaibelchhe nuai 1.76 zet a hloh phah nia sawi a ni. Licence pekchhuahnaah hian hetih laia telecom minister A Raja chu dik lo taka thiltiah puh a ni a, thubuai siamsak a ni. Hei vang hian kum 2010 khan minister a nihna aṭangin a bang a, kum 2011 khan man a ni tawh bawk. Kum khat dawn lung-ina a tan hnuah bail-a chhuah a ni.

Mahse nimin khan court chuan thil dik lo tihnaa inhnamhnawiha puhte hi an puhna finfiahna tur ṭha a awm lo nia sawiin, an thubuaiah hian thiam a chantir a ni.

2G thubuai hi kum 2011 aṭang khan ngaihtuah ṭan a ni. Supreme Court chuan Raja-an licence a lo pekchhuah tawhte a cancel sak bawk.

Kum 2010-a national auditor report-in a tarlan danin, kum 2007-2008 chhunga telecom operator-te hnena second generation (2G) licence pek chu lilam kalphung anga dik taka kalpui loin, man tlawm tak taka pek an ni tih a sawi. Man tlawm taka licence an hmuh theih nan han telecom operator-te chuan Raja hi thamna an pe nia sawi a ni a, mahse Raja chuan hei hi a pha thung.

2G scam kaihhawihah thubuai siamsak zingah hian Raja bakah ramchhunga telecom company promoter leh executive te pawh an tel. CBI chuan telecom-in Raja hnena thamna a pek, cheng vaibelchhe 200 chu Chennai-a TV channel pakhat hminga dah a nih thu a sawi a, he TV channel neitu zingah hian Tamil Nadu-a eptu pawl, DMK hruaitu M Karunanidhi fau, Kanimozhi pawh a tel. Hei vang hian Kanimozhi pawh hi thubuai siamsak a ni zui ve a ni.