Maha CM hlui Ashok Chavan-a khin a ni dawn lo - Bombay High Court

Bombay High Court chuan Zirtawpni khan thuchhuah siamin Maharashtra governor in Chief Minister hlui Ashok Chavan Adarsh housing society scam chungchanga a hekna chu khin a nih dawn loh thu an tarlang.

Tun dinhmuanah chuan Ashok Chavan chu khin a nih rih dawn loh thu High Court chuan an tarlang a, he scam-ah hian a inhnamhnawih ngei a ni tih finfiahna ṭha tawk a awm loh vanga khin theih a nih hrih loh thu an sawi bawk.

Maharashtra Governor Ch Vidyasagar Rao chuan Chavan hi Adarsh scam-ah hian a inhnamhnawih ni a puhin Court-ah hian a lo hek tawh a, Congress pawhin hemi avang hian CM a nihna aṭanga bang turin an lo nawr ve tawh bawk a ni.

Bombay High Court chuan Chavan chungchanga thubuai thehluh chu Central Bureau of Investigation (CBI) in evidence mumal tak an hmuh zawh loh avangin governor thubuai thehluh pawh hi ngaihtuah zui theih a nih loh thu an sawi. Dan chuan thubuai ngaihtuah a nih dawn chuan finfiahna mumal tak a phut bawk si avangin Chavan hi khin theih a ni dawn ta lo tih official te chuan an sawi.

Governor Rao hian section 197 (judges leh public servant te khin theihna chunghcang) of CrPC, Section 120-B (criminal conspiracy) leh 420 (cheating and dishonesty) of the Indian Penal Code (IPC) hnuaiah hian Chavan-a chungchangah hian nikum February thla khan thubuai a lo thehlut tawh a ni.

Chavan chuan heihi politics inchirhthehna a nih thu a sawi thung.

Adarsh scam-a inhnamhnawiha puhna vang hian 2010 khan CM a nihna aṭangin Chavan hi a bang a, Congress leader Prithviraj Chavan-a'n a ai a awh a ni.