Social security tana sum dah tam turin Jaitley-a ngen

Economist leh public policy expert 60-te chuan Union Finance Minister Arun Jaitley-a hnenah lekha thawnin, sorkar laipui chu social securiy scheme atana sum tam zawk dah turin an ngen.

Minister hnena lehkha thawntute chuan, old-age pension, window pension leh maternity entitlement atana sum dah chu budget pharh leh hun turah tisang turin an ngen a, heng scheme atana sorkar sum sen chu a hniam lutuk niin a sawi.

Kum 2006 aṭanga sorkar laipuiin National Old Age Pension Scheme (NOAPS) hnuaiah tar chawmna atana a pek chu thla khata Rs 200 a la ni reng tih sawiin, hei hi a tlem tham lutuk a ni, an ti. NAOPS chu scheme ṭha tak, mi retheite thleng phak a nih thu an sawi a, sorkar laipuiin he scheme hnuaia a sum thawh vek chu thla khatah Rs 500 tala tisang turin an phut a ni.

Minister hnena lehkha thawna hming ziaktu zingah hian economist lar Jean Drèze, Mihir Shah, Abhijit Banerjee, Ajit Ranade, C Rammanohar Reddy leh Himanshu, Jayati Ghosh te pawh an tel a ni. Pensioner-te tana sorkar sum pek tipung tura an phut ang hi kalpuiin vaibelchhe 2.4 pensioner te tan sorkar chuan cheng vaibelchhe 8,640 a dahbelh a ngai dawn a ni.

Hmeithaite hnena pension pek, thla khata Rs 300 pek ṭhin chu Rs 500-ah tal tisang turin an ngen bawk a, hemi atana sorkarin sum a sen belh tur hi cheng vaibelchhe 1,680 a tling dawn a ni.