Judge-te hlawh tihsanna tur bill pharh

Lok Sabha inkhawmah Supreme Court leh high court 24-a judge-te hlawh tihsanna tur bill chu Ningani khan pharh a ni.

Bill hi Parliament-in a pawm a, law-a chantir a nih hunah chuan Chief Justice of India-in thla khatah cheng nuai khat a hlawh ṭhin chu nuai 2.80 a kai dawn a ni. Supreme Court judge leh high court chief justice-ten thla khat hlawh, Rs 90,000 pawh cheng nuai 2.50 ah a pung dawn bawk.

High court judge-ten thla khata Rs 80,000 an hlawh ṭhin chu cheng nuai 2.25 ah tihsan a ni dawn bawk.

Judge-te hlawh tihsanna tur hi 7th Pay Commission-in all-India service officer-te hlawhbi thar a siam zulzuia siam a ni a, pawm a nih chuan January 1, 2016 aṭanga hman ṭan tura tih a ni ang.

High Court and Supreme Court Judges (Salaries and Conditions of Service) Amendment Bill, 2017 hian house rent allowance leh sumptuory allowance pek pawh ennawn turin a rawt bawk.

Supreme Court-ah judge 31 awm theihnaah hian judge 25 an awm mek a, high court hrang hrangah judge 1,079 awm theihna turah judge ṭanglai hi 682 an awm mek bawk. Judge-te hlawhbi siamṭhat rawtna hi pawm a nih chuan judge pension tawh 2,500 pawhin an chhawr ve thei dawn a ni.