Parliament Winter Session kar khata tihtawp hma a ni maithei

Parliament Winter Session neih mek chu ruahman lawk laiin kar khata hma, Zirtawpni hian tihtawp a ni maithei nia sawi a ni.

Eptu party hruaitu hrang hrangte chuan hunpui, Krismas leh Kumthar lawmna lo thleng tur avangin, session hi titawp hma turin an ngen a ni. An ngenna siam chungchangah hian Lok Sabha speaker Om Birla kaihhruai, Business Advisory Committee chuan thutlukna a siam ang.

Winter Session hi December 7 khan ṭan a ni a, December 29 thleng awh tura ruahman a ni. Session chhung hian India-China border-a ram pahnih sipaite intihbuaina thleng leh, hemi chungchang sawiho phutin eptu lam an aubuai ngun hle a, rorellai MP-te nena an inchhal ṭhin avangin rorel mumal thei loa awmin, inkhawm pawh tihtawp a ngaih phah fo a ni.

Eptu lamin India-China border chungchang sawiho an phutna chu phalsak an ni ṭhin loh avangin eptu MP-te chu House aṭangin an chhuak tau fo. Prime minister Narendra Modi chu ramria buaina thleng chungchangah a ngawih reng avangin an dem thu an sawi bawk.

BJP-in thupha chawi turin Congress an phut
BJP chuan nimina Rajya Sabha inkhawmah, Congress party chuan an president Mallikarjun Kharge-a'n BJP chungchang a sawi danah thupha chawi turin an phut a, rorel mumal thei loin member-te an inau buai leh.

Congress party hruaitu, Rahul Gandhi-a'n Bharat Jodo Yatra a neih mek chu BJP chuan elsen hmasain, Yatra chu mipui inpumkhatna tur ni lo, ṭhendarhtu 'Bharat todo (Divide India)' zawk a ni tiin an sawi. Hei hi Thawhṭanni khan Congress president chuan chhangin, Grand Old Party chuan India ram tan zalenna sual chhuakin, an party hruaitu Indira Gandhi leh Rajiv Gandhi-te ngei pawh ram tan nunna an hlan a ni, a ti. "I ina in ui takngial zingah ram tana nunna hlan an awm em ni? Hetichung hian BJP chuan ram hmangaihtu ber niin an inchhal a, kan thusawite chu ram dodalna, anti-national angin min chhuahsak ta zawk zel a ni," a ti. Kharge hian Parliament session-a China ramri buaina chungchang sawiho a remtih loh avangin BJP kaihhruai sorkar laipui chu sawisel bawkin, "BJP sorkar chu tawngkamah sakei ang maiin an huai a, a taka chet hunah erawh sazu ang chauh a ni," tiin a sawi zui bawk.

BJP chuan Congress president thusawi chu an dem thu sawiin, ṭawngkam chhe tak hmang leh thu dik tawk lo sawiah an puh. A ṭawngkam hman avang hian thupha an chawi ngei tur a ni, tiin Rajya Sabha-ah union commerce minister Piyush Goyal chuan a sawi a ni.

Rorellai leh eptu MP-te chu rorel thei loin an inau buai zui a, House chairman Jagdeep Dhankhar chuan khapin, Kharge thusawi chu Parliament pawn lama thleng a ni tih a sawi. Ram mipui vaibelchhe 135-ten an thlir reng a, naupang chhia ang maia awm tur an ni lo tiin MP-te chu a khak zui bawk.