Delhi Lt Governor leh AAP sorkar inbei leh

Delhi lieutenant governor VK Saxena chuan chief secretary hnenah Delhi-a rorellai, Aam Aadmi Party (AAP) chuan kum nga liam ta khan sorkar hmingin advertisement a tichhuak nia sawiin, advertisment man Rs vbc 97 chu lalet leh turin a hriattir. Hei hi AAP chuan chhang let nghalin, Lt Governor hian hetianga thupek siam tur hian thuneihna a nei lo tih an sawi.

Delhi civic body inthlan neih zawh takah AAP hian hnehna changin, kum 15 chhung BJP-in Municipal Corporation of Delhi (MCD)-a thuneihna an chan chu an tihtawp sak a ni.

Lt Governor Saxena chuan AAP hian Supreme Court (2015) leh Delhi High Court (2016) order siam bakah, Committee on Content Regulation in Government Advertising (2016)-in dan a siamte chu an bawhchhia niin a sawi. Hei vang hian Delhi sorkar fund aṭanga advertisment tihna tana sum hmante chu hmu kir leh vek turin a ti a ni.

AAP MLA Saurabh Bharadwaj chuan Lt Governor thupek siam chungchang chu chhangin, "BJP sorkarna state hrang hrang advertisement siam ngei pawhin Delhi-ah tihchhuah a ni. Heng advertisement atana an sum sen, Rs vbc 22,000 te chu engtikah nge an hnen aṭang hian ka hmuh let ang. Heng pawisa kan hmuh let hunah, Rs vbc 97 chu kan pe ve ang," a ti. Lt Governor chu BJP thupek dan apianga thiltiah puhin, Delhi mipuite tihbuai an tum a ni, tiin a sawi.

Delhi-a AAP sorkar leh BJP kaihhruai sorkar laipuiin Lt Governor a ruatte inkarah hian buaina hi a thleng fo a ni. Lt Governor chu BJP hian AAP sorkar tihbuai tumna hmanruaa hmang ṭhinah AAP chuan an puh.