Health Minister hoin Covid review meeting nei

Khawvel ram hrang hrangah Covid-19 hri leng a ziaawm chho mek a, hetih lai hian China ramah nasa taka hri kai an pun chhoh leh avangin ram dangte a tiralkhel hle. India ram pawhin China rama thil thleng mek a ngaihven hle a, nimin khan union health minister Mansukh Mandaviya hoin Covid chungchangah high-level review meeting neih a ni.

Sorkarin hri leng chungchanga kaihhruaina a siamah, face mask hman ngei ngei tur tih ni tawh lo mah se, nimina meeting-a tel, minister leh top official-te chuan face mask an hmang vek a ni.

Meeting-ah hian point paruk an ngaihtuah a, heng zingah hian international leh domestic airport-ah hri leng venna tur kalpui dan tur te, ram pawn lama khualzinte tana kaihhruaina siam te, Covid variant thar chungchangah mithiam bikte rawn chungchangte a tel.

Sorkar laipui chuan Covid positive-te sample chu INSACOG genome sequencing lab-a thawn zel turin state leh Union Territory-te a hrilh. INSACOG hi Health Minitry hnuaiah din niin, India rama Covid strain hrang hrangte zirchiang leh thlithlai zui tura tih a ni bawk.

Health secretary Rajesh Bhushan-ah state hrang hrang hnena lehkha a thawnah, "Japan, USA, SKorea, Brazil leh China-ahte hri kai an pung chho leh a, hei vang hian hri kaite chu eng variant nge tih hriat thuai an nih theihna turin genome sequencing tih ṭhat a ngai a ni," a ti.

Thawhlehni khan India ram pumah Covid-19 hri kai hmuh chhuah thar hi 129 awmin, hri kai mek hi 3,408 an la awm a ni.