Parliament Complex-ah eptu party-ten lungawi lohna lantir

Parliament Winter Session neih mekah, nimina Lok Sabha rorel inkhawma eptuten China nena ramria buaina thleng chungchang sawiho phut lehin, House aṭangin an chhuak tau. Parliament Complex-a Mahatma Gandhi lim bulah lungawi lohna an lantir zui nghal.

Lok Sabha-ah Zero Hour neih veleh, Congress leh Dravid Munnetra Kazhagam (DMK) member-te chu House aṭangin an chhuak a, Trinamool Congress (TMC) leh Janata Dal (United) MP-ten an zui ve nghal a ni.

Congress hruaitu Adhir Ranjan Chowdhury chuan speaker Om Birla hnenah India-China issue chu sawiho remti tura phutin, he thil sawiho phut tur hian eptu lamin dikna chanvo an nei a ni, a ti. "TV leh Parliament pawn lam hmun hrang hrangah hemi chungchang hi sawiho reng a ni. House-ah eptuten an sawi ve theihna hun remchang hi siam rawh, hei hi kan dikna chanvo a ni," ti hialin Speaker a nawr. Mahse Speaker hian a remtih sak loh avangin House aṭangin an chhuak leh a ni.