Sorkar laipuiin Rahul Gandhi-a Yatra ngaimawh thar

Union Health Minister chuan Bharat Jodo Yatra nei mek, Rahul Gandhi chu yatra an neihah Covid protocol zawm tura hrilhin, a thei lo a nih chuan yatra chu titawp mai turin a hrilh.

Hetih lai hian Congress party chuan BJP sorkar chu yatra tihbuai theihna remchang zawngah an puh. India rama Covid kaihhruaina hrang hrang, face mask vuah tihte pawh thlahdul vek a nih tawh hnuah eng ang kaihhruaina nge a la hman zel tih an zawt leh.

Gandhi hoa yatra neih mek hi ram pumin a ngaihven a, Delhi khawpui an luh hnaih tawh avangin BJP chuan tihbahhlah theih dan kawng a zawng niin an puh. Bharat Jodo Yatra hian December 24-ah Delhi an lut ang.

Minister Mansukh Mandaviya chuan Rahul Gandhi chu Covid protocol, facemask vuah leh sanitizer hman ṭhatte leh, kawng zawhnaah pawh vaccine la chin chauh tel tir turin a hrilh. "Covid protocol hi in zawm theih loh chuan, Covid hri leng laka ram venhim a nih theihna atan Bharat Jodo Yatra chu titawp mai turin ka ngen che," tiin a ziak. Sorkar laipui hian ram chhunga hri leng a ziaawm hnuah Covid kaihhruaina a thlahdul deuh vek tawh a, face mask hman chhunzawm a ṭhat thu a sawi rualin, hman ngei ngei tur tih thupek erawh titawp tawh a ni.

Sorkar laipuiin Gandhi-a yatra neih mek a rawn ngaihven thar thut chungchang chu Congress party hruaitute chuan an chhang let hlawm. MP Adhir Ranjan Chowdhuty chuan prime minister Narendra Modi khan Gujarat assembly inthlan dawna a campaign-naah khan Covid protocol-te a zawm em tih a zawt let. "Rahul Gandhi-a Bharat Jodo Yatra neih mek hi mipuite'n an ngaihvein an thlawp ṭha hle a, hei hi Mansukh Mandaviya hian a duh lo a ni. Mipuite rilru hruaikawi turin Mandaviya hi an rawn hmang a ni," a ti. Congress MP dang Karti Chidambaram pawhin BJP sorkarin yatra a rawn buaipui thar thut chu a chhan a zawt bawk.

Congress party chuan Karnataka leh Rajasthan-ah pawh BJP chuan yatra an nei a, heng yatra buatsaihtute chu Health Minister hian Covid protocol zawm vek tura hriattirna a pe ve em tih an zawt bawk a ni. Party hruaitu, Pawan Khera chuan public transport lamah pawh khuahkhirhna engmah a awm tawh lo a, sorkar laipui chuan Covid kaihhruaina dan a hman mekte chu puang se la, an party chuan an zawm zel tur thu a sawi.