PM Modi-a'n Covid vangin high-level meeting ko

Prime minister Narendra Modi chuan nimin khan Covid-19 hri leng dinhmun thlirin high-level meeting a ko.

Tun hnaia China rama hri kai an pun chakna chhan nia sawi, Covid BF.7 Omicron sub-variant kai chu India ramah thla ruk liam ta chhung khan mi pali hmuh an ni a, enkawl dam an ni vek tawh a ni. Ram chhunga Covid-19 variant chi hrang 10 awm mekah, BF.7 hi hmuh chhuah thar ber nia sawi a ni bawk.

Nilaini khan union health minister Mansukh Mandaviya hoin Covid-19 chungchangah high-level review meeting neih a lo ni tawh bawk. Minister chuan mipuite chu Covid kaihhruaina dante zawm ṭha tur leh, vaccine la vek turin a ngen. Hri leng chu a la tawp lo tih sawiin, official-te pawh hri darh thar leh tur venga chak zawka hma la turin a ti. National task force hotu, VK Paul chuan mipuite awmkhawm tamna hmunah chuan face mask vuah turin miputie a ngen bawk.

Sorkar chuan China leh ram dang aṭanga rawn lutte chu airport-ah sample test neihsak zel an ni leh dawn tih a sawi. Tun hnaiah China ram bakah Japan, South Korea, France leh US-ah hri kai hi an pung chho leh a, hri kai an pun lehna chhan ber hi inkaidarh awl tak, Omicron sub-variant BF.7 vang hi nia sawi a ni.