Rahul-a Yatra tihtawp nan sorkarin Covid-19 tichhuak leh : Team Uddhav

Shiv Sena-a Uddhav Thackeray lamṭangte chuan sorkar laipuiin Rahul Gandhi leh Rajasthan chief minister-te hnenah lehkha a thawn a, Bharat Jodo Yatra neih mekah Covid protocol an zawm theih dawn loh chuan yatra titawp mai tura an hrilhna chu na takin an sawisel.

Thackeray lamṭangte chanchinbu, Saamana-ah hemi chungchang hi ziakin, "Rahul Gandhi hian Bharat Jodo Yatra hi ni 100 a kal tling tawh a, mipui lam thlawpna pawh a hmu ṭha hle. Sorkar laipui hian eng dan hmang mahin a titawp sak ngawt thei si lo a, hei vang hian Covid-19 virus chu a rawn tichhuak ṭha leh a ni," a ti.

"Bharat Jodo Yatra vanga Covid kai an pun chhoh hlauhthawn leh chu a dik a ni. Mahse kum thum liam ta, hripui a len hluar lai pawh khan Gujarat-a zin turin US President Trump in a sawm a, mipui nuai tel an kalkhawm tho a ni," tiin an ziak.

Chhatisgarh chief minister Bhupesh Baghel pawhin sorkar laipui chu Congress Yatra neih mek tihtawp dan kawng zawngah a puh bawk.

Rahul Gandhi hoa yatra neih mekin Delhi khawpui a luh dawn hnaih veleh PM Modi-a'n Covid review meeting a ko chu an thil tum pawh an hriatthiam nghal thu Congress party chuan an sawi. Congress general secretary in-charge communication Jairam Ramesh chuan, "China rama an buaipui mek Omicron sub-variant kai pali chu July, September leh November thla daih tawha hmuh an ni," a ti. Hetih lai hian Rahul Gandhi-a'n Delhi a hnaih tawh avangin Health Minister chuan Covid chungchangah review meeting koin, a hnuah PM Modi chuan high-level meeting a ko leh bawk a, "An thil kalpui dan hi kan hrethiam vek a ni," a ti.