Eptuten Rajya Sabha rorel inkhawm boycott

Congress party kaihhruaiin eptu party zawng zawngte chuan India-China ramri buaina chungchang sawiho an phutna phalsak an nih loh avangin nimin atan Rajya Sabha rorel inkhawm an boycott.

Nimin chawhma lama Zero Hour hman laiin, eptu member-te chu ramria buaina thleng chungchang sawiho phutin House laiah an chhuakkhawm a, hei bakah hian Leader of House Piyush Goyal-a thusawi dan chu Bihar hmusitna a ni tiin an lungawi loh thu an sawi bawk.

Congress leader K C Venugopal chuan session ṭan ni aṭangin China nena ramri buaina an neih chu sawiho an phut a, mahse sorkar lam chuan a duh lo zel niin a sawi. Hei vang hian eptu member zawng zawng chuan nimina House inkhawm chu an boycott tih a sawi.

Union minister Piyush Goyal hian Thawhlehnia Appropriation Bill chungchang sawihonaa RJD MP Manoj Jha-a'n mi rethei leh hausate in sak turah ang khat veka ngaihsak tura a phut thu a sawi laiin, "RJD hian duh dan ang chuan ti thei se, ram pum hi Bihar-ah an chantir ang" tiin a lo sawi a ni. Eptuten a thusawi chungchanga an lungawi lohna lantir a, thupha chawi tura an phut hnuah Goyal chuan Bihar chungchang a sawi dan chu a sût thu sawiin, Bihar state leh state mipuite a hmusitna lam a ni lo tih a sawi bawk.