PM-in kum 2022 atana Mann Ki Baat hnuhnung ber hmang

Prime minister Narendra Modi chuan kumin chhunga thla tina radio programme a hman ṭhin, Mann Ki Baat hnuhnung ber tur leh a vawi 96-na chu nimin khan a hmang.

PM Modi chuan ram mipuite hnena thuchah a sawiah, khawvelah Covid-19 hri kai an pun chhoh leh mek avangin fimkhur turin a chah a, Covid kaihhruaina siamte zawm ṭha a,kut sil uar thar leh tur leh, punkhawmna hmunah facemask te hmang ṭha turin a chah. Mitinte kan fimkhur ṭheuh chuan kan him thei dawn a ni, a ti.

Ram mipuite chu Krismas chibai bukin, Isua nundan leh a zirtirnate hre reng turin mipui a chah. Kumthar lo thleng tur atan mipuite duhsakna hlan nghal bawkin, kumthar lamah pawh Mann Ki Baat chu chhunzawm zel a ni dawn tih a sawi.

Prime Minister chuan kum 2022 chhunga India-in hlawhtlinna hrang hranga neihte, a bikin medical sciences, Yoga leh Ayurveda lamah a hlawhtlinna neihte a sawilang. Thil thawnchhuah lamah USD tld 400 tlin a nih thu te, INS Vikrant air carrier neih thar thute pawh a sawilang bawk.

Ganga rejuvenation campaign 'Namami Gange'kalpui chungchang pawh sawilangin, United Nations-in ecosystem siamṭhat tura hmalaknaah khawvela top 10 zingah a thlang tel a ni, a ti. He campaign hi khavel ram hrang hrang aṭangin thlawp a hlawh thu a sawi.