Karnataka-in Covid-19 kaihhruaina thar siam

Karnataka sorkar chuan Covid-19 hri leng thawh lina a thlen palh venthawn thilah hri leng laka invenna tur kaihhruaina te a siam thar leh.

Nimin aṭanga hman turin state sorkar chuan movie theatre, pub, restaurant leh bar-ah facemask vuah vek turin a ti a, school leh college-ah pawh vuah leh vek turin a ti bawk. Hri darh leh palh thei a nih avangin, kumthar lawmna pawh zing dar 1 thleng chauh phal a ni dawn tih Heath Minister K Sudhakar chuan a sawi.

Bengaluru-a Bowring Hospital leh Mangaluru-a Wenlock Hospital te chu international passenger, Covid hri kai hmuh chhuahte enkawlna atan, quarantine centre-a hman turin an ruat fel tawh bawk.

Health Minister chuan China aṭanga an state-a lutte chu an sample lak vek niin, genome sequencing tura thawn zel a ni, a ti.