Congress-in Yatra palzut sak niin an sawi - Sorkarah Rahul Gandhi himna ngaihtuah sak turin ngen

Congress party chuan an party-in Bharat Jodo Yatra a neihah security lam palzut sak an ni fo tih sawiin, an party hruaitu Rahul Gandhi himna ngaihtuah sak turin sorkar laipui an ngen.

Union home minister Amit Shah hnenah lehkha thawnin, Congress general secretary KC Venugopal chuan kar liam Inrinnia Yatra-in Delhi khawpui an luh hnuah ṭum eng emaw zat security lam palzut sak an ni a, Delhi police-te chuan mipuite thunun thei loin, sorkarin Z+ security a pek mek Rahul Gandhi venhimna lam an ti ṭha tawk lo niin a sawi. Security lam a ṭhat loh avangin Congress worker leh Yatra-a tel ṭhenkhat chuan Gandhi himna tur hi an buaipui a ngai a, hetih lai hian Delhi police-te chuan an lo thlir mai mai zawk a ni, a ti. Hei bakah hian yatra-a telte chu Intelligence Bureau lamin thu an zawtfiah niin a sawi bawk.

Venugopal chuan Haryana-a Gurgoan-ah pawh yatra neih laiin Haryana state intelligence mi leh state chu dan loin Bharat Jodo Yatra container-ahte an lut nia sawiin, police-te pawh complaint an thehluh thu a sawi. Haryana-ah hian BJP kaihhruai ṭangrual sorkar a ding mek a ni.

Home Minister hnenah lehkha thawnah hian, India khua leh tui tute pawh chuan India ram khawi hmunah pawh kal turin dikna an nei vek a, Bharat Jodo Yatra chu ram chhunga remna leh muanna a awm theihna tura buatsaih a ni, a ti. Hetih lai hian sorkar laipui chuan he hun hi politics lama phubha lakna tur atan a hmang tur a ni lo a, Congress hruaitute himna chu a ngaihtuahpui zawk tur a ni, tiin an tarlang.

Party thupuangtu Pawan Khera pawhin Yatra tihtawp tuma phiarrukna a awm thu sawiin, Yatra hming tihchhiat tuma hmalakna a awm a, police leh media hmanga kawng hrang hranga tihbuai tumte chu an hlawhtling dawn chuang lo a ni, a ti.