China rama hri leng mek India tan hlauhthawn tur awm lo

China rama Covid-19 hri darh chho leh mek chu India ram tan lo chiai phahna tur a awm lo niin mithiamte chuan an sawi a, hemi rual hian mipuite chu fimkhur tur leh face mask erawh hmang ṭha turin an chah.

Tun hnaia China rama hri leng a hluar chhoh leh hnuah, sorkar laipui chuan hri darh leh huk thei tur laka invenna turin hma a la mek. Chian bakah Asia ram dang pali aṭanga rawn lutte chu India ram an rawn luh hma darkar 48 chhunga Covid-19 negative test report nei vek turin a phut. Thawhlehni khan hri a darh leh palh thulha hospital hrang hrangte dinhmun enfiahna atan ram pumah mock drill neih a ni bawk.

India ramah hri leng hi a ziaawm tawh hle a, hri kai mek pawh hin 3,400 vel chauh an awm tawh. Hetih lai hian China rama hri a len thar leh avangin mi tam takin an hlauthawng a ni. Mahse mithiamte chuan hlauthawn tur a awm lo tih sawiin, China ram dinhmun chuan khawvel ram dang, India pawh telin a tidanglam hran dawn lo niin epidemiologist leh health systems specialist Dr Chandrakand Lahariya chuan a sawi.

China rama leng mek nia sawi, Covid-19 omicron subvariant BF.7 kai chu India ramah mi pali hmuh an ni tawh a, mahse heng mite pawh hi enkawl dam vek an ni tawh tih health official-te chuan an sawi bawk.

Critical care expert Dr A Fathahudeen chuan India ram mipui tam zawkin Covid-19 vaccine dose hnih an lak avangin an immunity wall chu a ṭha tawk a, hei bakah hian China rama vaccine hman aiin India rama vaccine-te chuan hna an thawk ṭha zawk bawk a ni, a ti.

India ramah Covid vaccine hi dose tluklehdingawn 2.2 chuang pek chhuah a ni tawh a, booster dose 'precaution dose' erawh chu a la thei chin zinga 27% vel chauhin an la thung.