Uzbekistan naupang 18 thih chhanah India khuh damdawi puh

Uzbekistan health ministry chuan an rama naupang 18-te thih chhanah India siam khuh damdawi, Doc-1 Max a puh.

Naupang 18, thawk lama harsatna neite hian Indian firm, Noida-a Marion Biotech khuh damdawi siam hi an nei hnuah an thi niin a tarlang. He khuh damdawiah hian tel lo tur, ethylene glycol a awm a, naupangte hian damdawi hi a ei dan tur tawk aia tamin an ei bawk niin a tarlang a ni.

Kumin kumtir lam khan Gambia rama naupang 60 chuang thihna chhanah Haryana-a Maiden Pharma siam khuh damdawi chu puh a lo ni tawh bawk a ni.

Sorkar laipui chuan Uzbekistan health ministry thuchhuah chungchangah Uzbekistan thuneitute pawh biak nghal niin, thil awmdan chu chhui chiang mek a ni a, Marion Biotech pawh khuh damdawi siam hna hi tihtawp tir rih a ni tih a sawi. Uzbekistan rama damdawi dawr hrang hrang aṭangin Doc-1 Max syrup pawh laklet an ni tawh bawk.

Foreign ministry thupuangtu Arindam Bagchi chuan naupangte thih dan chhuinaah a theih angin an pui zel tih a sawi a, hemi rual hian naupangte hi doctor-in a chawh ni loin, pharmacist-te thurawn pek angin in lamah khuh damdawi hi pek an ni a, naupang dose zat tur aia tamin pek an ni bawk niin a sawi. Central Drugs Standard Control Organisation (CDSCO - north zone) leh Uttar Pradesh Drugs Controlling and Licensing Authority chuan he khuh damdawi hi zirchiang mekin, thil dik lo a awm a nih action lak a ni ngei dawn tih union health minister Mansukh Mandaviya chuan a sawi.

Marion Biotech hnenah khuh damdawi a siam hi India ramah pawh thawn darh tawh lo tura hrilhin, an damdawi siam dangte pawh sample endiksak anni bawk ang.