Union finance minister Nirmala Sitharaman

Union finance minister Nirmala Sitharaman chuan nimin tlai dar 4 khan press conference nei lehin, prime minister Narendra Modi-in hri leng vanga economic package, cheng vaibelchhe nuai 20 a lo puan tawh hmanna tur ṭhenkhat a puan belh leh. 

Finance Minister chuan nimina rua­hmanna a puante chu migrant worker, street vendor, small trade, self-employed leh loneitu tenaute pual  a nih thu a sawi. 

8    Loneitu, crop loan la te tana interest leh repayment incentive pek hun, March 1 tih chu May 31 thleng atan pawhsei a ni. A pung tlem zawka loan la loneitu hi vaibelchhe thum vel an awm a ni. 

8    Nitin inhlawhfa, ration card nei kher lote pawh sorkarin thla hnih chhung ei tur a pe dawn. Hemi atan hian cheng vaibelchhe 3,500 a seng dawn a, a sem hna hi state sorkar kutah dah a ni. 

8    State sorkarte chu inhlawhfate awmna tur, ei leh in pekna tur atan SDRF an hman phalsak a ni. Sorkar laipui chuan state hrang hrang hnenah hemi atan hian cheng vaibelchhe 11,000 a pe.

8    Hri leng vanga hmun danga inhlawhfa, mahni state lama hawte chu MGNREGA hmangin puih an ni ang. 

8    National level-a hman theih tur, ration card in ang tlang, 'one nation one ration' hman a ni dawn. He card hi nakkum March thlaah Public distribution system (PDS) in a huamte hnenah pek vek hman tum a ni. 

8    Nitina inhlawhfa ṭhin leh khawpuia mi rethei zawkte tan PPP mode hnuaiah in luah man tlawm zawka siamsakna tur, rental housing scheme sorkarin a siam thuai dawn. 

8    Inhlawhfaten state hrang hranga an hman theih turin PDS ration card chu portable-a siam a ni dawn. 

8    MUDRA-Shishu Loan late tan a pung aṭanga 2% chu thla 12 chhung atan sorkarin a peksak dawn a, sorkar sum sen tur hi Rs vbc 1,500 a tling. 

8    Street vendor-te puihna turin Rs vbc 5,000 ruahman a ni. Hemi atan hian thla khat chhungin special scheme siam a ni dawn a, capital Rs 10,000 pek an ni ang. 

8    Middle income group (annual income Rs nuai 6-18 chin) tan Credit Linked Subsidy Scheme (CLSS) chu March 2021 thleng pawhsei a ni a, hei hi middle income chhungkaw nuai 2.5 ten an chhawr thei dawn a ni. 

8    Tribal sector thuam chakna turin Rs vbc 600 fund dah a ni. 

8    Loneitu tenau leh harsa zawkte tan, NABARD hnuaiah Rs vbc 30,000 dah belh a ni a, hei hi loneitute vaibelchhe thum velin an chhawr ṭangkai thei dawn a ni. 

8    Kisan credit card kaltlangin loneitute puihna atan Rs vbc nuai hnih ruahman a ni a, card la nei lote bakah sangha mantute leh ran vulhtute pawh a huam tel ang. 

A thusawi tlangkawmna atan finance minister chuan media mite chungah lawmthu sawiin, sorkarin hri leng kara mipuite harsatna tawh mek sutkian leh chhawk zangkhaina tura ruahmanna a siam leh a hnathawhte chu thehdarh sakturin a ngen zui a ni.