Kum 2023-ah state 9-ten assembly inthlan nei dawn - Party tan 2024 inthlanpui atana insawhnghehna hun tur
Kum 2023 chhung hian India ram state pakuaah assembly inthlan neih a ni dawn a, heng inthlante hi political party-te tan kum 2024 Lok Sabha inthlanpui lo awm tur atana lo inbuatsaih leh insawhnghehna hun a ni dawn. Assembly inthlan neihna tur hrang hrang atan hian BJP leh eptu party lian Congress party-te chuan beihpui an thlak chhoh nasat hle rin a ni.
Kumina inthlan neihna turte -
Hmarchhak : Hmarchhak bialah Meghalaya, Tripura leh Nagaland-te chu kumtir lam, February -March velah an inthlan rin a ni a, kum tawp lamah Mizoramah inthlan hi neih a ni bawk ang. Tripura-ah hian BJP leh a thawhpui, tualchhung party IPFT chu an sorkar mek a, Nagaland leh Meghalaya-ah BJP chuan sorkar laite a thlawp bawk. Tripura-ah hian kum 2018-ah BJP chuan a ṭum khatna atan sorkar an siam a, mahse party chhung hel an tam chhoh avangin an dinhmun pawh a derthawng chho deuh a ni.
Karnataka : Souht India lama BJP chakna,Karnataka hi May thlaah aninthlang ang. BJP leh Congress chu inbei ber tur an ni a, anni bakah Janata Dal (Secular) pawhin thawm an neih chhoh hle rin a ni bawk.
Telangana : India rama state naupang ber, Telangana hi November-December velah an inthlan rin a ni. Congress leh BJP bakah, K Chandrasekhar Rao kaihhruai Bharat Rashtra Samithi te an inbei ang. BRS hian 2024 Lok Sabha thlirin, an party dinhmun sawhngheh tumin ṭan an la hle.
Madhya Pradesh : Anni pawh kum tawp lam, November-December velah an inthlang dawn a, rorellai BJP leh Congress party-te an inbeih nat leh hle rin a ni. India rama state lian ber dawttua hnehna chan hi Lok Sabha inthlan lo awm tur atan pawh political party-te tan awmzia a nei thei hle dawn a ni.
Chhattisgarh leh Rajasthan : Heng state pahnihah hian Congres party chuan a zawna sorkarna siam leh ngei an tum ang. An chak leh thei anih chuan 2024 inthlanpui neih tur atan pawh an party a tihchak phah thei dawn a ni. Rajasthan-ah Congress hruaitu pahnih,Ashok Gehlot leh Sachin Pilot-te inkara inhruipawhna awm chuan media lam ngaihven pawh a hlawh zual phah dawna a ni.