Junior coach chunga mawi lo taka chea puh Haryana Sports Minister lakah thubuai ziaklut

Chandigarh police-te chuan mipat hmeichhiat lam hawia junior athletics coach hmeichhe pakhat chunga mawi lo taka chea puh, Haryana sports minister leh Olympian Sandeep Singh lakah nimin khan thubuai an ziaklut.

Thubuai siamsak a nih hnuah Sandeep Singh hian sports protfolio chu chief minister Manohar Lal Khattar kuta a hlan nghal a, cabinet member a nihna aṭang erawh chuan a bang lo.

Kum 36 mi, Indian national hockey team captain hlui,Sandeep Singh chuan an puhna chu thu dik lo, politics lamah tihchhiat an tumna hmanrua niin a sawi. Dik lo taka an puhna hi uluk taka chhui chian ngei a nih a beisei thu a sawi.

Chandigarh police chuan minister puhna chungchang chhui chiang tur hian member pali awmna Special Investigation Team a din nghal.

Minister laka complaint thehluttu, junior coach hian thil pawimawh avanga minister camp offce-a hmu tura a kal ṭumin, Singh hian mawi lo takin alo khawih a, a t-shirt pawh a pawhthlersak niin a sawi. Ṭanpuitu tur a au chuan minister staff-te hi awm mah se tumahin an pui lo tih a sawi bawk a ni. Mahse Singh chuan hmeichhiain a puhna hi thu belhchian dawl lo a ni a, chhui chian pawh a inhuam thu a sawi. A hmeichhe nungchang leh nundante pawh chiang taka chhui vek a ṭul tih a sawi bawk.