Chhattisgarh-ah biak-in suasam - Police officer-in hliam a tuar

Chhattisgarh-a tribal Bastar bial chhunga Narayanpur district-ah nimin khan tualchhung miten Kristian biak-in an suasam. Pawikhawihtute dan an tumnaah superintendent of police Sadanand Kuma leh security force mi pakhatin hliam an tuar.

Narayanpur district-ah hian kum 2022, December thla laihawl aṭang khan tualchhung mi leh Kristian tribal-te inkarah buaina a chhuak ṭan a ni. Pathianni khan Gorra khuaah tribal group chuan mi tam tak Kristian sakhuaa inlehtir an ni tia sawiin, lungawi lohna lantirin kawng an zawh. Kawngzawhte leh Kristian tribal-te chu intibuai zuiin, mi pariatin hliam an tuar a ni. Tualchhung mite hian Kristiante hi ramdang schhakhua zawm tiin an puh a, khua chhuahsana ramhnuaiah cheng turin an ti a ni.

Naarayanpur district-a thingtlang khaw eng emaw zatah Kristian-te hian beih tawkin, Narayanpur collector hnenah pawh memorandum an lo thehlut tawh a ni. Kristian sakhua an zawm avangin kutthlak leh an in aṭanga hnawhchhuakte an tawk tih an sawi. Kutthlak leh hnawhchhuak tawh Kristian hi chhungkaw 60 vel an awm tawh nia sawi a ni bawk.

Pathiannia tribal group leh Kristian-te intihbuai thleng duh lohna lantirin nimin khan Sarva Adivasi Samaj chuan lungawi lohna lantir a, an nawrh huaihawtna kal zelah an zinga ṭhenkhat chuan biak-in hi beiin an suasam zui ta a ni.

Police-te chuan pawikhawihtute hi thunun tumin hma an la zui nghal a, mahse tribal group member-te hian lungtum leh tiang nen police team hi an lo bei zui bawk. Boruak an thunun thei tawh nia an ngaih hnuah, SP Kumra hi hnung lam aṭangin tu tih hriat lohin beiin, a lu ah hliam a tuar a, damdawi-inah enkawl nghal a ni. SP chuan biak-in beitute hi chhui chian an ni nghal dawn tih a sawi.

Narayanpur collector Ajit Vasant pawhin Advisi group chuan lungawi lohna lantir an tum laiin, an member ṭhenkhat chu thunun theih loha awmin biak-in hi an bei ta niin a sawi.