Supreme Court-in pawisa note tih thih a pawmpui - Judge zinga pakhatin a pawm ve thei lo

Supreme Court chuan kum 2016-a prime minister Narendra Modi-a'n pawisa note lian pahnih a tih thih chungchanga petition lut chu ngaihtuahin, judge panga zinga paliin PM thutlukna an pawmpui a, judge pakhat erawh chuan dan loa thiltih a ni, a ti thung.

Kum 2016, November 8-a sorkar laipuiin Rs 1000 leh Rs 500 note a tihthih chungchangah,sorkar thiltih dan duh loin petition hi 58 zet a lut. Heng petition-te hi Supreme Court-a judge panga awmna, constitution bench chuan a ngaihtuah a ni.

Petition thehlutte chuan sorkar hian a thutlukna siam hi a ngaihtuah ṭha tawk lo nia sawiin, ram mipui mi maktaduai telte harsatna a thlen a ni, an ti.

Court chuan sorkarin pawisa note a tihthih hi black money leh firfiakte ṭanpuina pek ṭhinte titawpna tura a tih niin, chhan ṭha tak nei a ni, a ti. A thil tum hi a tihhlawtling ngei em tih erawh chu tuna an ngaihtuah tur zinga mi a ni lo tih a sawi bawk. Petition thehluttu ṭhenkhatin pawisa note hlui thlengna hun hawng leh tura an ngenna chu tih theih a ni tawh lo tih a sawi bawk a ni.

Bench-a judge tam zawk, jugde paliin sorkar thutlukna siam an pawmpui laiin, judge pakhat BV Nagarathna erawh chuan a thlawp lo. Pawisa note tihthih chungchangah sorkar laipui chuan thutlukna a siam nghal ngawt tur a ni lo tiin, note hi tihthih a nih dawn chuan thupek tichhuak ngawt loin, Parliament kaltlangin a kalpui tur a ni, a ti.