Amit Shah-a'n tun thla chhungin state 11 tlawh dawn

Union home minister Amit Shah chuan kum 2024 Lok Sabha inthlanpui neih tura atana an party thuam chhuakna tur campaign-na atan, tun thla chhung hian state 11 a tlawh dawn.

BJP-in 'Lok Sabha Prawas' tih hmanga beihpui thlakin,parliamentary constituency-te tlawh chhuah an tum a ni. He hmalakna hmang hian Amit Shah chuan January thla chhungin state 11 a tlawh dawn a, campaign bul ṭanna atan hian hmarchhak state a hmang ang. January 5 leh 6 hian Tripura, Nagaland leh Manipur tlawhin, January 7-ah Chhattisgarh leh Jharkhand-te a tlawh ang.

January 8-ah chhim lamah kalin, Andhra Pradesh a tlawh ang. December 30 khan Karnataka state chu a lo tlawh tawh a ni.

Kumina assembly inthlan neihna tur, Karnataka state chu Shah hian January 28-ah a tlawh ang.

Tun thla chhunga Amit Shah-a'n a tlawh tur zingah hian West Bengal, Uttar Pradesh, Haryana leh Punjab-te an tel.

Nakkuma Lok Sabha inthlanpui lo awm turah BJP hian thuneihna sawhnghet a, Lok Sabha seat 543 aṭangin seat 350 tal lak tumin "Mission 350" an siam a ni. Parliamentary constituency hrang hrang tlawh kual an tum bakah, inthlan hmasaa BJP chak lohna bial leh, vote tlemte hmang chauha an chakna hmunahte nasa zawka campaign chhoh an tum. Ṭan lak an ngaih zualna bial 160 hi an thlang fel tawh a, heng hmunah hian inthlanpui lo awm turah BJP-in hnehna a chan ngei theihna turin beihpui thlak an tum a ni.

Kum 2014-a prime minister Narendra Modi kaihhruai NDA sorkar a din aṭang khan Amit Shah hian ram chhung hmun hrang hranga BJP huang zauh leh tihchakna atana mi pawimawh tak niin, inthlan hmachhawn dan tura pawh an kal dan ruahmantu pawimawh tak a ni.