Bharat Jodo Yatra-in km 3,000 kal tling tawh

Congress party hruaitu, Rahul Gandhi hoa Bharat Jodo Yatra neih chu Krismas leh Kumthar vuakveta ni kua an chawlh hnuah, nimin aṭang khan kal ṭan lehin chawhnu lamah Uttar Pradesh state an lut.

Uttar Pradesh-ah hian Rahul Gandhi leh 'yatris' te chu party worker-ten Loni border-ah an lo hmuak. Nimina yatra neihnaah hian Rahul Gandhi hi a farnu, Priyanka Gandhi Vadra chuan a ṭawiawm. UP-ah hian ni hnih an kal dawn a, naktuk tlaiah Panipat, Haryana an thleng ang.

Yatra hi ni 110 neih ni tawhin, km 3,000 chuang an kal tawh a ni. September 7 khan Tamil Nadu aṭanga kal ṭanin,Kerala, Karnataka, Andhra Pradesh, Telangana, Madhya Pradesh, Rajasthan, Maharashtra, Haryana leh Delhi an paltlang tawh a, Jammu and Kashmir-ah an tawp dawn a ni. Congress party chuan India chanchina politician-in yatra a neih thui ber a ni tih an sawi.

January 30-ah Srinagar-ah Yatra hi an tawp dawn a, hemi zawh hian Congress chuan thla hnih chhung 'Haath Se Haath Jodo' campaign an nei zui nghal ang a, AICC national general secretary Priyanka Gandhi Vadra chuan a kaihruai ve thung ang. He campaign-ah hian ram chhung hmeichhiate dinhmun chu thlur bing deuh bik a ni ang.