Kumhlui thlah niah Delhi-ah zu um nuai 20.30 hralh

Krimas leh Kumthar ni inkarah Delhi khawpuiah zu, um vaibelchhe khat chuang hralh chhuakin, kum thum chhunga an hralh hnem ber record a tling. An zu hralhchhuah hi cheng vaibelchhe 218 man chuang a ni.

Nikhat thila zu hralh chhuah hnem ber chu kumhlui thlah ni, December 31 kha niin,hemi ni bik hian zu um 20.30, cheng vaibelchhe 45.28 hu hralh chhuah a nih thu excise department official-te chuan an sawi. Krismas urlawk ni, December 24 khan zu um nuai 14.7, cheng vaibelchhe 28.8 man hralh a ni tih an sawi bawk. Zu an hralh chhuah zinga a tam zawk hi whiskey a ni.

Nikum December thla chhung khan national capital region (NCR) ah chawh rualin ni khatah zu um nuai 13.8 zel hralh ang a ni a, kum thum chhunga an hralh ṭhat ber ṭum a ni. Delhi sorkar chuan December thla bikah zu aṭang hian chhiah, cheng vaibelchhe 560 a lalut thei.

Noida, Uttar Pradesh-ah pawh kumhlui thlah ni khan zu hi cheng vaibelchhe 9 chuang man hralh chhuah niin, kum hmasa lama a hralh aiin 23%-in a tam zawk. December thla chhung khan zu hi Rs vbc 139 man vel an hralh chhuak a ni.

Uttar Pradesh excise department-in a tarlan danin, kum 2022 chhung khan state chhungah zu hi Rs vbc 70,000 vel man hralh chhuah a ni. Lucknow, Kanpur leh Ghaziabad-te chu zu hralh chhuah tamna niin, kum khat chhungin zu leina atana an sum sen hi Rs vbc 1,800 - 2,800 inkar a tling.