Covid-19 thihpui tam ram pangana India

India ramah Covid-19 kai an pung zel a, nimina Ministry of Health and Family Welfare-in report an tihchhuahah chuan hri kai hmuh chhuah thar mi 55,078 an awm leh a, hei hi ni khata hri kai hmuh chhuah thar tam ber a ni leh. 

Hri len ṭantirh aṭanga nimin thleng khan hri kai mi 16,38,870 an awm tawh a, enkawl dam 10,57,805 lai an awm tawh a, mi 5,45,318-in an la kai mek bawk. 

Darkar 24 chhungin dama puan mi 37,223 lai awm lehin enkawl dam rate hi 64.54% a ni tawh. Nimin report-ah hian Covid-19 thihpui mi 779 an awm leh a, India ramah hian mi 35,747-in an thihpui tawh a, khawvel ram hrang hranga Covid-19 vanga thi tam ram pa­ngana a ni tawh a ni. Thihpui rate hi 2.18% a ni thung.

Indian Council of Medical Research(ICMR) chuan ni khatah sample 6,42,588 an enfiah tih tarlangin hei hi ni khatah sample an enfiah tam ber ṭum a ni. ICMR hian sample test lamah hian hma an la chak hle a, a tirah chuan ramchhung hmun hrang hranga ni khata sample an test zat chu 100-te a ni a, thla li chhung velin ni khata an test theih zat hi nuai ruk chuangah a kai ta a ni. 

Hri len ṭantirh aṭanga nimin thleng khan sample 1,88,32,970 an endik tawh. Laboratory pawmpui 1321 an nei tawh bawk a, heng zinga 911 hi sorkar laboratory niin 420 chu private laboratory a ni bawk.

Vande Bharat Mission thawh ngana chu vawiin hian ṭan a ni leh tawh dawn a, ram 23-a India mi tangkhangte hruai haw an ni leh dawn. Phase five-ah hian thlawhtheihna 792 lai tirhchhuah a ni dawn a, mahse a vai hian International flight a ni dawn lo a, 692 chu international flight an nih laiin 100 chu domestic flight a ni dawn thung.

Vawiina ṭan tur, Vande Bharat Mission-ah hian US, Canada, UK, Germany, France, Australia, New Zealand, Malaysia, Philippines, Singapore, Bangladesh, Myanmar, Thailand, China, Israel, leh Kyrgyzstan-a tangkhangte pawh hruai haw an ni dawn a ni. Nimin thleng khan ram hrang hrang aṭangin mi 54,180 chu hruai haw an ni tawh a, heng mite hi thlawhtheihna 395 hmangin hruai haw an ni.