Chhattisgarh biak-in beih chungchangah mi 5 man Man zingah tualchhunga BJP hruaitu a tel

Chhattisgarh-a Kristian biak-in beih a nih chungchangah police-te chuan mi panga an man tawh. An man zingah hian tualchhunga BJP hruaitu a tel.

Police-te chuan biak-in beih kaihhnawihah hian FIR pathum an ziaklut tawh bawk. He pawikhawihna thlengah hian Narayanpur SP Sadanand Kumar chuan a lu ah hliam a tuar a ni.

Buaina a chhuah palh venthawn thilah, police-te chuan BJP MP pahnih leh MLA te'n Narayanpur tlawh an tum chu an lo dang bawk. State assembly inkhawmah pawh eptu pawl, BJP MLA te chuan Narayanpur-a biak in beih a nih chungchang hi sawichhuakin, Congress sorkar chu sakhaw inlehna thleng ṭhinte ngaihven ṭha tawk lo leh, hemiin a nghawng zel niin an sawi. Sorkar chu mawhphurtuah an puh a ni.

BJP chuan tribal area-ah dinhmun harsa leh rethei zawkte chu pawisa, zirna leh enkawlna hmanga thlemin an sakhua lehtir an ni fo a, hengte hi Congress sorkar hnuaiah a thleng vek niin an sawi. 'Hetianga sakhaw inlehtirna thleng duh lohna lantirtute chu Kristian missionary-ten kut an thlak a, police ten engtinmah an ti lo. Hemi kal zelah hian Narayanpur-ah hian buaina hi a chhuak ta zawk a ni,' tiin, state sorkar chuan sakhaw inlehna thleng ṭhin chu ngaihvenin hma la ni se, he buaina chhuak pawh hi pumpelh theih tur a ni, an ti.